宜蘭俗諺

1.閃冬才會輕鬆 
行過台灣真濟所在,只有宜蘭才有這一個風俗,查某仔嫁翁第一年滿四個月的六月初六、十六抑是廿六揣一工會使轉去外家渡假,假期結束外頭厝會準備真濟物仔予查某仔紮轉去,表示宜蘭人是真惜查某囝

2.暗光飛就山 棕簔笠仔提來幔 暗光飛就海 棕簑笠仔就來採
  宜蘭是一個真愛落雨的所在,暗光鳥(夜鷺)佇宜蘭算是一種常常看的鳥仔 ,如果看到鳥仔飛去山裡代表欲落大雨,如果飛向海邊代表欲好天

3.芭荖鬱仔一个窟,牲醴拜拜家己囫 
   宜蘭是一個真愛落雨的所在,芭荖鬱仔是這馬的員山惠好村,往過每一年八月十三是一年一度的大拜拜,但是逐年這工攏真愛落雨,準備真濟物件有當時落雨抑是風颱等無人攏家己食,所以有這个 俗諺

4.陳林李結生死,姓林的氣著娶家己
聽講佇清朝同治年間,佇羅東冬山近有姓林和李的因為跋筊引起一寡糾紛,姓陳的佇中間調整,但是調解不成,姓陳和姓李聯合起來對抗姓林的,造成姓來的氣著講後擺一定無欲和姓陳和李結親情,甘願姓林的娶姓林的

5.叭哩沙二萬五紅柴林桕跤廍見做戲見落雨
這攏是三星地區地名,逐工這個所在欲做戲時攏真愛落雨,其實宜蘭真濟地區攏是按呢,毋是驚請人客是驚準備遮濟攏無人來為落大雨

6.豆腐刀削番薯皮
台灣早期有械鬥事件,而宜蘭早期和別位所在無仝有因為樂器無仝的福祿和西皮相拚,早期宜蘭西門附近有一個番薯舍就是人講的黃及西是真有錢是西皮派,另外有一個賣豆腐的珍仔是福祿派,有一年王爺生日,豆腐珍仔倩幾陣陣頭佇番薯舍厝外踅來踅去,番薯舍以為是真濟陣頭,仝一年田都元師生日時,番薯舍就開閣較濟的錢倩陣頭來拚勢面,地方上真濟人講這著是豆腐刀削番薯皮,這馬如果佇宜蘭西門經過猶閣會使看著黃及西往過洋樓,雖然人去樓空,但是會使看出來黃及西往過是真好額的人,宜蘭西門是古早宜蘭上熱鬧的所在,宜蘭上早的夜市仔嘛佇西門。

7.金蠅捻翼做蔭豉,海籠仔拗跤變豆乳
 佇宜蘭早期北管音樂因為理念不同,而造成罕見的音樂械鬥,主要有分做二派,福路和西皮二派,福路以金蠅為標誌,西皮派笑講若是共金蠅的翼捻掉,會使做成咱人食的蔭豉,西皮派是以海籠仔為標誌,若是共八隻跤拗斷就像一塊豆乳,這二派人馬如果廟會見 面常常會冤家。 

8.龜山若戴帽, 大雨就會落

宜蘭外海的龜山島守護每一个宜蘭人,嘛是看會落雨上重要的所在,龜山頂懸若是烏雲共規个龜山島崁起來,連鞭就摔大雨。 

9.宜蘭人食精

宜蘭人是非常重視食的所在,食物件希望食精美,所以宜蘭小食講實在攏真好食。 

10.嫁種蔥,食袂空

講起宜蘭三星是目前台灣種蔥上有名的所在,若是嫁予種蔥的人做太太,免驚無飯通食。 

11.五間崩到柯仔林

講起宜蘭是一个真愛落雨所在,往過常常落雨,會位壯圍鄉美城村大福路附近的五間淹到柯仔林(這馬宜蘭壯圍功勞村附近),所以有這句宜蘭俗語。 

12.宜蘭淡水天,雨傘囥門邊。

宜蘭和台北淡水攏是真愛落雨的天氣, 雨傘是一般民眾生活用品,普通時會直接囥佇門邊,若是落雨直接攑出門,免揣真久攏毋知囥佗位。

12玉堂毋知散,周頂毋知富。

宜蘭街仔人林玉堂為人豪爽,無錢會以做壽、喜慶名目邀請一寡人來,順紲收禮金,所以 毋知啥物是散食。周頂是員山大湖底周氏氏舉人的阿爸,伊是非常有錢,但是伊無啥知影伊是真有錢,政府欲收土地稅,真濟人攏甲土地講是周頂的,所以周頂嘛加納真濟錢。 周氏過去算大湖底有錢人前二个,目前佇員山猶有周氏舉人宅遺跡。 

13二月初八–人看人

二月初八過去是宜蘭市城隍廟一年一度大鬧熱,會看到真濟大神尪出巡,非常熱鬧,所以這工講人看人,但是宜蘭市三月二十八嘛是仝款情形,所以後來二月初八、三月二十八輪流舉辦,算宜蘭市仔一年一度的神明大事。 

14 田園開到濁水溪頭

濁水溪是宜蘭上長的一條溪,如果厝內的田園會使會使位厝附近開墾到濁水溪邊,代表厝內是好額人。

15 二結霆水螺

日本時代宜蘭二結有糖廠,逐工中晝十二點會霆水螺代表歇睏食飯時間到矣,附近的民眾也以十二點霆水螺對時,嘛知影愛歇睏。 

16 姓林的媽祖顧家己

台灣俗語講陳林滿天下,佇宜蘭林是上大姓,宜蘭有林姓家族無甲林默娘叫媽祖,叫做姑婆祖,有林姓的人若是拄著緊急事件,姑婆產攏會來鬥相仝,所以姓林的媽祖顧家己。 

17 王通塭做戲流棚枋,過嶺做戲烘火籠。 

有人講宜蘭愛落雨,王通塭是目前宜蘭時潮村,往過年底攏會演戲,但是宜蘭厚雨水,附近地勢嘛較低,所以常常會淹水,做戲的戲枋攏會浮佇水面;過嶺永鎮廟倚海邊,宜蘭寒天有東北季風來,天氣真寒會擋袂牢,年底永鎮廟做戲時因為真冷,所以看戲的人真濟攏提火籠烘袂袂遐寒。 

18 頂深溝,下深溝,芭荖鬱仔,大三鬮

這句無特別意思,只是甲員山鄉一寡地名變成一个順口溜。頂深溝佇目前員山蓁巷村,下深溝佇目前深溝村,往過是仝村;芭荖鬱仔是目前惠好村,是溫泉意思,但是目前惠好村並無溫泉,是毋是往過芭荖鬱仔是經過遷徙,佇員山公園時可能有溫泉,大三鬮佇這馬尚德村,鬮聽講是泉州人開墾用抽鬮仔決定啥分佇一地的方式,宜蘭有三鬮二、四鬮三等地名。

19去枕頭山

人睏攏會用著枕頭,這句是講欲來去睏的意思。 枕頭山佇宜蘭員山鄉,目前附近有真濟餐廳,嘛會使遠遠看宜蘭市美景。 

20柯仔林做大水 –無駁

宜蘭是愛落雨所在,柯仔林佇目前壯圍鄉功勞村,古早時駁岸常常做大水予沖歹了了,所以攏會淹大水,對老百姓生活較無保障, 所以無駁 ,諧音無保。